https://dharmawiki.org/index.php?action=history&feed=atom&title=Adiparva_Adhyaya_55_%28%E0%A4%86%E0%A4%A6%E0%A4%BF%E0%A4%AA%E0%A4%B0%E0%A5%8D%E0%A4%B5%E0%A4%A3%E0%A4%BF_%E0%A4%85%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83_%E0%A5%AB%E0%A5%AB%29 2026-05-02T16:56:18Z Revision history for this page on the wiki MediaWiki 1.35.4 https://dharmawiki.org/index.php?title=Adiparva_Adhyaya_55_(%E0%A4%86%E0%A4%A6%E0%A4%BF%E0%A4%AA%E0%A4%B0%E0%A5%8D%E0%A4%B5%E0%A4%A3%E0%A4%BF_%E0%A4%85%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83_%E0%A5%AB%E0%A5%AB)&diff=120724&oldid=prev 2019-10-16T11:59:45Z

<p>new pg</p> <p><b>New page</b></p><div>आस्तीक उवाच<br /> <br /> सोमस्य यज्ञो वरुणस्य यज्ञः प्रजापतेर्यज्ञ आसीत्प्रयागे।<br /> <br /> तथा यज्ञोऽयं तव भारताग्र्य पारिक्षित स्वस्ति नोऽस्तु प्रियेभ्यः॥ 1-55-1<br /> <br /> शक्रस्य यज्ञः शतसंख्य उक्तस्तथा परं[पूरो]स्तुल्यसंख्यं शतं वै।<br /> <br /> तथा यज्ञोऽयं तव भारताग्र्य पारिक्षित स्वस्ति नोऽस्तु प्रियेभ्यः॥ 1-55-2<br /> <br /> यमस्य यज्ञो हरिमेधसश्च यथा यज्ञो रन्तिदेवस्य राज्ञः।<br /> <br /> तथा यज्ञोऽयं तव भारताग्र्य पारिक्षित स्वस्ति नोऽस्तु प्रियेभ्यः॥ 1-55-3<br /> <br /> गयस्य यज्ञः शशबिन्दोश्च राज्ञो यज्ञस्तथा वैश्रवणस्य राज्ञः।<br /> <br /> तथा यज्ञोऽयं तव भारताग्र्य पारिक्षित स्वस्ति नोऽस्तु प्रियेभ्यः॥ 1-55-4<br /> <br /> नृगस्य यज्ञः तुअजमीढस्य चासीद्यथा यज्ञो दाशरथेश्च राज्ञः।<br /> <br /> तथा यज्ञोऽयं तव भारताग्र्य पारिक्षित स्वस्ति नोऽस्तु प्रियेभ्यः॥ 1-55-5<br /> <br /> यज्ञः श्रुतो दिवि देवस्य सूनोर्युधिष्ठिरस्याजमीढस्य राज्ञः।<br /> <br /> तथा यज्ञोऽयं तव भारताग्र्य पारिक्षित स्वस्ति नोऽस्तु प्रियेभ्यः॥ 1-55-6<br /> <br /> दिलीपराज्ञो नहुषस्य राज्ञो नलस्य राज्ञश्शतबिन्दोश्च राज्ञः।<br /> <br /> तथा यज्ञोऽयं तव भारताग्रय पारीक्षित स्वस्ति नोऽस्तु प्रियेभ्यः॥<br /> <br /> कृष्णस्य यज्ञः सत्यवत्याः सुतस्य स्वयं च कर्म प्रचकार यत्र।<br /> <br /> तथा यज्ञोऽयं तव भारताग्र्य पारिक्षित स्वस्ति नोऽस्तु प्रियेभ्यः॥ 1-55-7<br /> <br /> इमे च ते सूर्यसमानवर्चसः समासते वृत्रहणः क्रतुं यथा।<br /> <br /> नैषां ज्ञातुं विद्यते ज्ञानमद्य दत्तं येभ्यो न प्रणश्येत्कदाचित्॥ 1-55-8<br /> <br /> ऋत्विक्समो नास्ति हि भूतलेऽस्मिन्[लोकेषु चैव] द्वैपायनेनेति विनिश्चितं मे।<br /> <br /> एतस्य शिष्याः हि क्षितिं सञ्चरन्ति [क्षितिमाचरन्ति] सर्वर्त्विजः कर्मसु स्वेषु दी[द]क्षाः॥ 1-55-9<br /> <br /> विभावसुश्चित्रभानुर्महात्मा हिरण्यरेता हुतभुक्कृष्णवर्त्मा।<br /> <br /> प्रदक्षिणावर्तशिखः प्रदीप्तो हव्यं तवेदं हुतभुग्वष्टि देवः॥ 1-55-10<br /> <br /> नेह त्वदन्यो विद्यते जीवलोके समो नृपः पालयिता प्रजानाम्।<br /> <br /> दिष्ट्या[धृत्या] च ते प्रीतमनाः सदाहं त्वं वा वरुणो धर्मराजो यमो वा॥ 1-55-11<br /> <br /> शक्रः साक्षाद्वज्रपाणिर्यथेह त्राता लोकेऽस्मिंस्त्वं तथेह प्रजानाम्।<br /> <br /> मतस्त्वं नः पुरुषेन्द्रेह लोके न च त्वदन्यो भूपतिरस्ति य[ज]ज्ञे॥ 1-55-12<br /> <br /> खट्वाङ्गनाभागदिलीपकल्प ययातिमान्धातृसमप्रभाव।<br /> <br /> आदित्यतेजः प्रतिमानतेजा भीष्मो यथा राजसु[सि] सुव्रतस्त्वम्॥ 1-55-13<br /> <br /> वाल्मीकिवत्ते निभृतं स्ववीर्यं वसिष्ठवत्ते नियतश्च कोपः।<br /> <br /> प्रभुत्वभिन्द्रत्वसमं मतं मे द्युतिश्च नारायणवद्विभाति॥ 1-55-14<br /> <br /> यमो यथा धर्मविनिश्चयज्ञः कृष्णो यथा सर्वगुणोपपन्नः।<br /> <br /> श्रियां निवासोऽसि यथा वसूनां निधानभूतोऽपि[सि] तथा क्रतूनाम्॥ 1-55-15<br /> <br /> दम्भोद्भवेनासि समो बलेन रामो यथा शास्त्रविदस्त्रविच्च।<br /> <br /> और्वत्रिताभ्यामसि तुल्यतेजा दुष्प्रेक्षणीयोऽसि भगीरथेन॥ 1-55-16<br /> <br /> सौतिरुवाच<br /> <br /> एवं स्तुताः सर्व एव प्रसन्ना राजा सदस्या ऋत्विजो हव्यवाहः।<br /> <br /> तेषां दृष्ट्वा भावितानीङ्गितानि प्रोवाच राजा जनमेजयोऽथ॥ 1-55-17<br /> <br /> इति श्रीमहाभारते आदिपर्वणि आस्तीकपर्वणि सर्पसत्रे आस्तीककृतराजस्तवे पञ्चपञ्चाशत्तमोऽध्यायः॥ 55 ॥</div>

P16459