https://dharmawiki.org/index.php?action=history&feed=atom&title=Adiparva_Adhyaya_135_%28%E0%A4%86%E0%A4%A6%E0%A4%BF%E0%A4%AA%E0%A4%B0%E0%A5%8D%E0%A4%B5%E0%A4%A3%E0%A4%BF_%E0%A4%85%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83_%E0%A5%A7%E0%A5%A9%E0%A5%AB%29 2026-04-29T07:00:51Z Revision history for this page on the wiki MediaWiki 1.35.4 https://dharmawiki.org/index.php?title=Adiparva_Adhyaya_135_(%E0%A4%86%E0%A4%A6%E0%A4%BF%E0%A4%AA%E0%A4%B0%E0%A5%8D%E0%A4%B5%E0%A4%A3%E0%A4%BF_%E0%A4%85%E0%A4%A7%E0%A5%8D%E0%A4%AF%E0%A4%BE%E0%A4%AF%E0%A4%83_%E0%A5%A7%E0%A5%A9%E0%A5%AB)&diff=120301&oldid=prev 2019-08-22T09:50:07Z

<p>Created page with &quot;वैशम्पायन उवाच एतस्मिन्नेव काले तु तस्मिन्जनसमागमे। दत्तेऽवका...&quot;</p> <p><b>New page</b></p><div>वैशम्पायन उवाच<br /> <br /> एतस्मिन्नेव काले तु तस्मिन्जनसमागमे।<br /> <br /> दत्तेऽवकाशे पुरुषैर्विस्मयोत्फुल्ललोचनः[नैः]।<br /> <br /> विवेश रङ्गं विस्तीर्णं कर्णः परपुरञ्जयः॥ 1-135-1<br /> <br /> सहजं कवचं बिभ्रत्कुण्डलोद्द्योतिताननः।<br /> <br /> सधनुर्बद्धनिस्त्रिंशः पादचारीव पर्वतः॥ 1-135-2<br /> <br /> कन्यागर्भः पृथुयशाः पृथायाः पृथुलोचनः।<br /> <br /> तीक्ष्णांशोर्भास्करस्यांशः कर्णोऽरिगणसूदनः॥ 1-135-3<br /> <br /> सिंहर्षभगजेन्द्राणां बलवीर्यपराक्रमः।<br /> <br /> दीप्तिकान्तिद्युतिगुणैः सूर्येन्दुज्वलनोपमः॥ 1-135-4<br /> <br /> प्रांशुः कनकतालाभः सिंहसंहननो युवा।<br /> <br /> असङ्ख्येयगुणः श्रीमान्भास्करस्यात्मसम्भवः॥ 1-135-5<br /> <br /> स निरीक्ष्य महाबाहुः सर्वतो रङ्गमण्डलम्।<br /> <br /> प्रणामं द्रोणकृपयोर्नात्यादृतमिवाकरोत्॥ 1-135-6<br /> <br /> स समाजजनः सर्वो निश्चलः स्थिरलोचनः।<br /> <br /> कोऽयमित्यागतक्षोभः कौतूहलपरोऽभवत्॥ 1-135-7<br /> <br /> विवेश रङ्गं विस्तीर्णं कर्णः परपुरञ्जयः॥<br /> <br /> सहजं कवचं बिभ्रत्कुण्डलद्योतिताननः॥<br /> <br /> सधनुर्बद्धनिस्त्रिंशः पादचारीव पर्वतः।<br /> <br /> कानीनस्तु पृथुयशाः पृथापुत्रः प्रतापवान्॥<br /> <br /> सोऽब्रवीन्मेघगम्भीरस्वरेण वदतां वरः।<br /> <br /> भ्राता भ्रातरमज्ञातं सावित्रः पाकशासनिम्॥ 1-135-8<br /> <br /> पार्थ यत्ते कृतं कर्म विशेषवदहं ततः।<br /> <br /> करिष्ये पश्यतां नॄणा[णां]माऽऽत्मना विस्मयं गमः॥ 1-135-9<br /> <br /> असमाप्ते ततस्तस्य वचने वदतां वर।<br /> <br /> यन्त्रोत्क्षिप्त इवोत्तस्थौ क्षिप्रं वै सर्वतो जनः॥ 1-135-10<br /> <br /> प्रीतिश्च मनुजव्याघ्र दुर्योधनमुपाविशत्।<br /> <br /> ह्रीश्च क्रोधश्च बीभत्सुं क्षणेनान्वाविवेश ह॥ 1-135-11<br /> <br /> ततो द्रोणाभ्यनुज्ञातः कर्णः प्रियरणः सदा।<br /> <br /> यत्कृतं तत्र पार्थेन तच्चकार महाबलः॥ 1-135-12<br /> <br /> अथ दुर्योधनस्तत्र भ्रातृभिः सह भारत।<br /> <br /> कर्णं परिष्वज्य मुदा ततो वचनमब्रवीत्॥ 1-135-13<br /> <br /> दुर्योधन उवाच<br /> <br /> स्वागतं ते महाबाहो दिष्ट्या प्राप्तोऽसि मानद।<br /> <br /> अहं च कुरुराज्यं च यथेष्टमुपभुज्यताम्॥ 1-135-14<br /> <br /> कर्ण उवाच<br /> <br /> कृतं सर्वमहं मन्ये सखित्वं च त्वया वृणे।<br /> <br /> द्वन्द्वयुद्धं च पार्थेन कर्तुमिच्छाम्यहं प्रभो॥ 1-135-15<br /> <br /> दुर्योधन उवाच<br /> <br /> भुङ्क्ष्व भोगान्मया सार्धं बन्धूनां प्रियकृद्भव।<br /> <br /> दुर्हृदां कुरु सर्वेषां मूर्ध्नि पादमरिन्दम॥ 1-135-16<br /> <br /> वैशम्पायन उवाच<br /> <br /> ततः क्षिप्तमिवात्मानं मत्वा पार्थोऽभ्यभाषत।<br /> <br /> कर्णं भ्रातृसमूहस्य मध्येऽचलमिव स्थितम्॥ 1-135-17<br /> <br /> अर्जुन उवाच<br /> <br /> अनाहूतोपदि[सृ]ष्टानामनाहूतोपजल्पिनाम्।<br /> <br /> ये लोकास्तान्हतः कर्ण मया त्वं प्रतिपत्स्यसे॥ 1-135-18<br /> <br /> कर्ण उवाच<br /> <br /> रङ्गोऽयं सर्वसामान्यः किमत्र तव फाल्गुन।<br /> <br /> वीर्यश्रेष्ठाश्च राजानो बलं धर्मोऽनुवर्तते॥ 1-135-19<br /> <br /> किं क्षेपैर्दुर्बलायासैः शरैः कथय भारत।<br /> <br /> गुरोः समक्षं यावत्ते हराम्यद्य शिरः शरैः॥ 1-135-20<br /> <br /> वैशम्पायन उवाच<br /> <br /> ततो द्रोणाभ्यनुज्ञातः पार्थः परपुरञ्जयः।<br /> <br /> भ्रातृभिस्त्वरयाऽऽश्लिष्टो रणायोपजगाम तम्॥ 1-135-21<br /> <br /> ततो दुर्योधनेनापि सभ्रात्रा समरोद्यतः।<br /> <br /> परिष्वक्तः स्थितः कर्णः प्रगृह्य सशरं धनुः॥ 1-135-22<br /> <br /> ततः सविद्युत्स्तनितैः सेन्द्रायुधपुरोगमैः।<br /> <br /> आवृतं गगनं मेघैर्बलाकापङ्क्तिदा[हा]सिभिः॥ 1-135-23<br /> <br /> ततः स्नेहाद्धरिहयं दृष्ट्वा रङ्गावलोकिनम्।<br /> <br /> भास्करोऽप्यनयन्नाशं समीपोपगतान्घनान्॥ 1-135-24<br /> <br /> मेघच्छायोपगूढस्तु ततोऽदृश्यत फाल्गुनः।<br /> <br /> सूर्यातपपरिक्षिप्तः कर्णोऽपि समदृश्यत॥ 1-135-25<br /> <br /> धार्तराष्ट्रा यतः कर्णस्तस्मिन्देशे व्यवस्थिताः।<br /> <br /> भारद्वाजः कृपो भीष्मो यतः पार्थस्ततोऽभवन्॥ 1-135-26<br /> <br /> द्विधा रङ्गः समभवत्स्त्रीणां द्वैधमजायत।<br /> <br /> कुन्तिभोजसुता मोहं विज्ञातार्था जगाम ह॥ 1-135-27<br /> <br /> तां तथा मोहमापन्नां विदुरः सर्वधर्मवित्।<br /> <br /> कुन्तीमाश्वासयामास प्रेष्याभिश्चन्दनोदकैः॥ 1-135-28<br /> <br /> ततः प्रत्यागतप्राणा तावुभौ परिदंशितौ।<br /> <br /> पुत्रौ दृष्ट्वा सुसम्भ्रान्ता नान्वपद्यत किञ्चन॥ 1-135-29<br /> <br /> तावुद्यतमहाचापौ कृपः शारद्वतोऽब्रवीत्।<br /> <br /> द्वन्द्वयुद्धसमाचारे कुशलः सर्वधर्मवित्॥ 1-135-30<br /> <br /> अयं पृथायास्तनयः कनीयान्पाण्डुनन्दनः।<br /> <br /> कौरवो भवता सार्धं द्वन्द्वयुद्धं करिष्यति॥ 1-135-31<br /> <br /> त्वमप्येवं महाबाहो मातरं पितरं कुलम्।<br /> <br /> कथयस्व नरेन्द्राणां येषां त्वं कुलभूषणः[णम्]॥ 1-135-32<br /> <br /> ततो विदित्वा पार्थस्त्वां प्रतियोत्स्यति वा न वा।<br /> <br /> वृथाकुलसमाचारैर्न युध्यन्ते नृपात्मजाः॥ 1-135-33<br /> <br /> वैशम्पायन उवाच<br /> <br /> एवमुक्तस्य कर्णस्य व्रीडावनतमाननम्।<br /> <br /> बभौ वर्षाम्बुविक्लिन्नं पद्ममागलितं यथा॥ 1-135-34<br /> <br /> दुर्योधन उवाच<br /> <br /> आचार्य त्रिविधा योनी राज्ञां शास्त्रविनिश्चये।<br /> <br /> सत्कुलीनश्च शूरश्च यश्च सेनां प्रकर्षति॥ 1-135-35<br /> <br /> अद्भ्योऽग्निर्ब्रह्मणः क्षत्रमश्मनो लोहमुत्थितम्।<br /> <br /> तेषां सर्वगतं तेजः स्वासु योनिषु शाम्यति॥<br /> <br /> यद्ययं फाल्गुनो युद्धे नाराज्ञा योद्धुमिच्छति।<br /> <br /> तस्मादेषोऽङ्गविषये मया राज्येऽभिषिच्यते॥ 1-135-36<br /> <br /> वैशम्पायन उवाच<br /> <br /> (ततो राजानमामन्त्र्य गाङ्गेयं च पितामहम्।<br /> <br /> अभिषेकस्य सम्भारान्समानीय द्विजातिभिः॥)<br /> <br /> गोसहस्रायुतं दत्त्वा युक्तानां पुण्यकर्मणाम्।<br /> <br /> अर्होऽयमङ्गराज्यस्य इति वाच्य द्विजातिभिः॥<br /> <br /> ततस्तस्मिन्क्षणे कर्णः सलाजकुसुमैर्घटैः।<br /> <br /> काञ्चनैः काञ्चने पीठे मन्त्रविद्भिर्महारथः॥ 1-135-37<br /> <br /> अभिषिक्तोऽङ्गराज्यस्य[ज्ये स] श्रिया युक्तो महाबलः।<br /> <br /> (समौलिहारकेयूरैः सहस्ताभरणाङ्गदैः।<br /> <br /> राजलिङ्गैस्तथान्यैश्च भूषितो भूषणैः शुभैः॥)<br /> <br /> सच्छत्रवालव्यजनो जयशब्दोत्तरेण च॥ 1-135-38<br /> <br /> (सभाज्यमानो विप्रैश्च प्रदत्त्वा ह्यमितं वसु।)<br /> <br /> उवाच कौरवं राजा[जन्] वचनं स वृषस्तदा।<br /> <br /> अस्य राज्यप्रदानस्य सदृशं किं ददानि ते॥ 1-135-39<br /> <br /> प्रब्रूहि राजशार्दूल कर्ता ह्यस्मि तथा नृप।<br /> <br /> अत्यन्तं सख्यमिच्छामीत्याह तं स सुयोधनः॥ 1-135-40<br /> <br /> एवमुक्तस्ततः कर्णस्तथेति प्रत्युवाच तम्।<br /> <br /> हर्षाच्चोभौ समाश्लिष्य परां मुदमवापतुः॥ 1-135-41<br /> <br /> इति श्रीमहाभारते आदिपर्वणि सम्भवपर्वणि कर्णाभिषेके पञ्चत्रिंशदधिकशततमोऽध्यायः॥ 135॥</div>

Pṛthvī